ᖃᓄᖅ ᑐᓂᓯᔪᓐᓇᖅᐳᖓ ᐅᖃᐅᓯᒃᓴᓂᒃ?

ᑕᒪᕐᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᖃᐅᔨᓴᖅᑕᐅᓂᖓᓄᑦ ᐃᓄᓕᒫᓄᑦ ᐅᖃᐅᓯᒃᓴᓕᐅᕐᕕᖃᖅᐳᖅ ᑎᑭᐅᒪᔪᓄᑦ ᐅᓪᓗᓄᑦ 21-ᓄᑦ. ᖃᐅᔨᓴᖅᑕᐅᓂᐅᔪᒥᑦ ᐱᒋᐊᖅᑎᑕᐅᔪᖃᕈᓂ, ᐃᓄᓕᒫᓄᑦ ᐅᖃᐅᔾᔨᓂᕐᒥᒃ ᑐᓂᔭᐅᔪᖃᓲᖑᕗᖅ ᖃᕋᓴᐅᔭᑎᒍᑦ ᑎᑎᕋᕐᓂᒃᑯᑦ ᑐᓐᓂᖅᓴᖅᑕᐅᓂᐅᔪᓄᑦ ᑎᑎᕋᖅᓯᒪᔪᓄᑦ ᐃᓗᓕᖃᖅᑐᓂ ᐱᑕᖃᑐᐃᓐᓇᕆᐊᓕᖕᓂ ᐊᒃᑐᖅᑕᐅᓇᔭᖅᑐᓂᒃ ᓄᓇᓕᖕᓂ, ᓇᓗᓇᐃᖅᑕᐅᓯᒪᔪᓂᒃ ᐃᓄᖕᓂ ᑲᑐᔾᔨᖃᑎᒌᖑᔪᓄᑦ, ᒐᕙᒪᓕᕆᔨᐅᔪᓄᑦ ᐊᒻᒪᓗ ᐊᓯᖏᓐᓂ ᐱᔪᒪᔪᓄᑦ ᐱᓕᕆᖃᑕᐅᔪᒪᔪᓄᑦ.  ᐱᓕᕆᖃᑕᐅᔪᑦ ᖃᐃᖁᔭᐅᕙᒃᐳᑦ ᑐᓂᓯᓂᕐᒥᑦ ᐅᖃᐅᓯᒃᓴᒥᓂᑦ ᐱᔾᔪᑎᖃᖅᑐᒥᒃ ᐊᖏᕈᑕᐅᓇᓱᐊᖅᑐᖅ ᐱᓕᕆᐊᒃᓴᒧᑦ ᐊᒻᒪᓗ ᐱᑕᖃᑐᐃᓐᓇᕆᐊᓕᖕᒥᑦ ᐊᒃᑐᐃᓂᖏᓐᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᓱᒪᒃᓴᖅᓯᐅᕈᑎᒃᓴᖓᓐᓄᑦ. ᑕᒪᕐᒥᒃ ᐅᖃᐅᓯᒃᓴᓕᐊᑦ ᓴᓇᔭᑦ ᑕᐃᑲᓂ ᖃᐅᔨᓴᐃᓂᐅᔪᒥᑦ ᓴᖅᑭᑎᑕᐅᕙᒃᐳᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᖃᕋᓴᐅᔭᑎᒍᑦ ᐊᑎᓕᐅᖅᑕᐅᕕᖓᓐᓂ ᐊᒻᒪᓗ ᑕᑯᔭᐅᔪᓐᓇᖅᐳᑦ ᐃᓄᓕᒫᓂᑦ.
 
ᐊᑎᓕᐅᕆᓂᕐᒥᑦ ᐊᑐᒐᒃᓴᖓᓐᓂ ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᐃᓄᓕᒫᓄᑦ ᐊᑎᓕᐅᖅᑕᐅᕕᖓᓐᓂ, ᑐᒃᓯᕋᕈᓐᓇᖅᐳᑎᑦ ᐱᓂᕐᒧᑦ ᐅᖃᐅᔾᔨᓂᐅᔪᓂᒃ ᐱᔾᔪᑎᖃᖅᑐᒥᒃ ᑕᒪᕐᒥᒃ ᓄᑖᓂᒃ ᖃᐅᔨᓴᖅᑕᐅᓂᖓᓄᑦ ᐱᓕᕆᐊᒃᓴᐅᔪᓄᑦ ᐃᓂᐅᔪᓂᑦ ᐱᓕᕆᔪᒪᔭᕐᓂᑦ. ᐊᑎᓕᐅᕆᓯᒪᓂᕐᒧᑦ ᐊᑐᖅᑎᐅᓗᑎᑦ ᐊᑎᓕᐅᕆᔪᓐᓇᕆᕗᑎᑦ ᒪᓕᖕᓂᕐᒧᑦ ᐃᖏᕐᕋᔪᓂᒃ ᖃᐅᔨᓴᐃᓂᐅᔪᓂᑦ ᐊᒻᒪᓗ ᐱᓂᕐᒧᑦ ᐃᓚᒋᔭᖏᓐᓂ ᐅᖃᐅᔾᔨᓂᐅᔪᓂᑦ, ᐊᒻᒪᓗ ᐊᑐᕈᓐᓇᕐᓂᐊᖅᐳᑎᑦ ᓄᓇᕗᑦ ᐊᕙᑎᓕᕆᓂᕐᒥ ᑲᑎᒪᔨᖏᓐᓄᑦ ᖃᕋᓴᐅᔭᑎᒍᑦ ᐅᖃᐅᓯᒃᓴᓕᐅᕐᓂᕐᒧᑦ ᑕᑕᑎᕆᐊᓕᖕᓂ ᑐᓂᓯᓂᕐᒧᑦ ᐅᖃᐅᓯᒃᓴᓕᐊᕐᓂᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᓱᒪᒃᓴᖅᓯᐅᕈᑕᐅᓂᐊᖅᑐᓄᑦ.

ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓈᒻᒪᒃᓴᓲᖑᒋᕗᑦ ᐅᖃᐅᓯᒃᓴᓕᐊᓂᑦ ᑐᓂᔭᐅᔪᓂᑦ ᓱᒃᑲᔪᒃᑯᑦ (867-983-2594) ᐅᕝᕙᓘᓐᓃᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒃᑯᑦ (info@nirb.ca). ᑐᓂᓯᑎᓪᓗᑎᑦ ᐅᖃᐅᓯᒃᓴᓕᐊᓂᑦ ᐃᓚᓕᐅᔾᔨᓂᐊᖅᐳᑎᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᑐᖅᑯᖅᑕᐅᓂᖓᓂ ᓈᓴᐅᑎᖓᓐᓂ, ᐱᓕᕆᐊᒃᓴᐅᑉ ᐊᑎᖓᓐᓂ ᐊᒻᒪᓗ ᖃᐅᔨᒋᐊᕐᕕᒃᓴᕐᓄᑦ ᐅᖃᐅᓯᒃᓴᖏᓐᓂᑦ. ᖃᐅᔨᒋᐊᕐᕕᒋᔪᓐᓇᖅᐸᐃᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᑭᖃᙱᑦᑐᒧᑦ ᐅᖃᓗᒡᕕᖓᓄᑦ ᖃᖓᑐᐃᓐᓇᑦᑎᐊᖅ ᐅᖃᖃᑎᖃᕐᓂᕐᒧᑦ ᐃᖅᑲᓇᐃᔭᖅᑎᑦᑎᓐᓄᑦ ᐅᖃᐅᓯᒃᓴᓕᐊᕐᓂᑦ ᐅᕝᕙᓘᓐᓃᑦ ᐃᓱᒪᓗᑎᒋᔭᕐᓂᑦ: 1-866-233-3033.